Ano nga ba ang kontemporaryong isyu? Ang kontemporaryong isyu ay
tumutukoy sa pangyayari, ideya, opinyon, o paksa na may kaugnayan sa
kasalukuyang panahon. Ito ay sumasaklaw
sa interes ng mga tao. Ito rin ang
tinatalakay na paksa sa kasalukuyan na binibigyang-pansin ng mga mamamayan. Ito
ay napapansin sa mga balita at usapan dahil naapektuhan ang nakararami at ang
mga mamamayan sa isang bansa, rehiyon, o ng buong mundo. Sa ating bansa,
kadalasang isyu ay tungkol sa ating lipunan na kung saan ito ay umiikot sa
kaganapang pampulitika, gaya ng mga panukala ng ating gobyerno, usaping showbiz
kung saan tinatalakay ang mga isyu ng mga artista na nasasangkot sa masamang
gawain. Ngayon talamak na ang pag gamit internet at social media, nag iiba na
rin ang pamamaraan ng pagtatalakay ng mga isyu. Kung dati ay nasa diyaryo,
radio, at telebisyon lang napag-uusapan ang mga isyu, ngayon kahit sino ay
maari ng sumali sa talakayan. Ang kontemporaryong isyu ay nag-iiba ayon sa mga
taong naguusap-usap dahil may kanya-kanyang alalahanin ang iba’t ibang sector
ng lipunan. May mga paksa pa ring sumasaklaw sa karamihan bagamat nakatutok
lamang ito sa isang pangkat. Isang halimbawa ay ang isyu ng libreng matrikula.
Hindi lamang ito makakaapekto sa mga estudyante, kasali rin ang ating mga
magulang, guro, paaralan, gobyerno, at buong bansa.
Mayroong apat na
uri ang kontemporaryong isyu, una ay ang kontemporaryong isyung panlipunan.
Dito tinatalakay ang mga isyu na tungkol sa ating lipunan tulad ng: pension hike, halalan, rasismo, palitan
ng pera, at terorismo gaya ng kaguluhan sa marawi na hanggang ngayon ay hindi
pa rin natatapos.
Ang ikalawang
kontemporaryong isyu, kontemporaryong isyung pangkalusugan. Dito tinatalakay
ang isyung pangkalusugan tulad ng: sobrang katabaan, Kanser, HIV/AIDS, drug
addiction, malnutrisyon, at iba pang nakahahawang sakit.
Ang ikatlong
kontemporaryong isyu ay ang kontemporaryong isyung pangkapaligiran na kung saan
tinatalakay ang mga isyung nakaapekto sa ating kapaligiran gaya ng: global
warming, bagyo, polusyon, at lindol. Dahil kung ito ay ating pinabayaan
maaaring wala ng tao ang nabubuhay sa mundo pagdating ng panahon, dahil tao rin
ang patuloy na sumisira ng ating tirahan.
Ang pangapat na
kontemporaryong isyu at ang kontemporaryong isyung pangkalakalan. Dito
tinatalakay ang pag export/import ng mga produkto ng iba’t ibang bansa, online shopping, free trade, at pandaigdigang samahan.
Bakit nga ba
kailangang talakayin ang kontemporaryong isyu? Kailangan nating talakayin ang
kontemporaryong isyu upang malaman natin ang nangyayari sa ating paligid at
magkaroon ng kaalaman ukol dito. Kailangan natin malaman kung ano ang mga
maaring maging mabuting solusyon upang mabawasan ang mga isyu na ito at
magkaroon tayo ng mapayapa at maayos na mundo.
